तुझ्याचसाठी...

सोडून गेले शरीर जरी हे, विश्व सारे व्यापेन मी
तुझ्याचसाठी तुज सभोवती, बघ निरंतर राहेन मी

असूसशील तू मज पहाण्या, नजर उचलूनी वेध घे
तुझ्याचसाठी आसमंती, ता॰यांमधे राहेन मी

व्याकूळशील तू मज स्पर्शण्या, नयन मिटूनी स्तब्ध हो
तुझ्याचसाठी हलकेच तेव्हा, वा॰यामाधुनी वाहेन मी

शब्द माझा ऐकण्या तू, कासावीस होशील कधी
तुझ्याचसाठी गाज होऊनी, लाटांमधुनी बोलेन मी

नीज येता वाटेल तुजला, माझ्या कुशीची ओढ रे
तुझ्याचसाठी अंधार होउनी, वेढूनी तुजला घेईन मी

विरह माझा जाळेल जीवा, दीर्घ एकच श्वास घे
तुझ्याचसाठी प्राण होऊनी, हृदयी तुझिया स्पंदेन मी

ओढ

या जन्मी जरी तुज, प्रथम पाहिले, शतजन्मांची ओळख आहे
तुला पहिले अन् मला वाटले की, जन्मांतरीची ही ओढ आहे || धृ ||

कधी सखी मी, अन् तू माझा, होतास प्रिय सखा
त्या मैत्रीची साथ ना आता, परि अंतरासी तुझी ओढ आहे || १ || तुला पहिले अन् ...

कधी मनगटी, तुझ्या बांधिला मी, नाजूक रेशीम धागा
त्या धाग्याचा बंध ना आता, परि अंतरासी तुझी ओढ आहे || २ || तुला पहिले अन् ...

कधी प्रिया मी, अन् तू माझा, होतास जिवलग प्रिया
त्या प्रीतीचा गंध ना आता, परि अंतरासी तुझी ओढ आहे || ३ || तुला पहिले अन् ...

कधी होवोनी, माय तुला मी, पाजिला अमृत पान्हा
त्या पान्ह्याची सय ना आता, परि अंतरासी तुझी ओढ आहे || ४ || तुला पहिले अन् ...

कुणी सांगावे किती जन्मांमध्ये, भेटलो तू अन् मी
कुणी सांगावे किती नात्यांमध्ये, फिरलो तू अन् मी
या जन्मी जरी नाते न काही, परि अंतरासी तुझी ओढ आहे || ५ || तुला पहिले अन् ...